Pinoy Ka. Wag Kang Magpakatanga..

May mata ka di ba? Nakakarinig ka. Pero bakit hirap na hirap kang makita ang tunay na kalagayan ng nasa paligid mo? Bakit di mo magawang sandaling pakinggan ang daing ng mga naliligaw na kaluluwang kumakatok at humihingi ng pagkalinga sa iyong puso? Hindi ka naman bulag o bingi para hindi maaninag ang katotohanang lantaran ng ipinamumukha sayo. O sadyang manhid ka lang? Nagbibingi-bingihan. Sayang ang kakayahang ibinigay sayo kung pati ang paghihirap ng bayan mo ay kahit minsan hindi gumambala sayo. Palibhasa, kung ano lamang ang nakakakapagpapabusog sa mapanlilang mong mata ang pipiliing tingnan nito. Kung ano lamang ang maganda sa pandinig mo ang pakikinggan nito.

Pansinin mo ang mga taong kadiliman ang kayakap habang ika’y nagtatampisaw sa init at liwanag ng nagngangalit na araw. Isipin mo ang mga taong katahimikan ang nagsisilbing musika. Ang mga hindi nakakalad, mga hindi nakakahawak. Mga mahihirap. Mga taong walang kinilalang magulang, inabuso, inapi. Sila pa na sabihin na natin ay, pinagmalupitan ng kapalaran, ang siya pang lubos na nakikiramdam sa paligid nila. Sila pa ang mas nakauunawa. Sila pa ang umiintindi. Sila na pinagkaitan ng kapalaran, ngunit hindi ng pagkakataon. Ngunit natuto silang gamitin ang chansa, at ang kung anong meron sila upang mapabuti ang kalagayan mo. MO.

Maswerte ka’t kumpleto ka. Ikaw ang lubos na may kakayahang baguhin ang takbo ng mundo. Ikaw dapat ang gumagawa ng paraan para mapabuti ang katayuan mo, ng lahat ng tao. Pero hindi. Ikaw pa mismo ang gumagawa ng tiyak na ikalulugmok mo, ng bayan. Ikaw na may kapasidad pa sanang gumawa ng pagbabago ang siya pang magiging dahilan upang kamuhian ka ng mundo. Inabuso mo ang kakayahan mo! Gumawa ka ng mga desisyong ikaw lang ang nakinabang. Naging makasarili ka. Manhid. Gahaman. Ayaw mo bang makitang nagpupunyagi ka, kasabay ng pagtatagumpay ng bayan mo? Wag kang maging hangal. Matuto kang makiramdam. Tingnan mo ang tunay na nangyayari. Wag mong palaging lilimitahan ang sarili mo sa mga bagay na interes mo lamang ang kayang paligayahin. Wag mong bulagin ang sarili mo sa katotohanan.

Alam ko matalino ka. Kumilos ka. May kakayahan ka, may magagawa ka.